حب غريب
الحب الغريب!!! عمرك جربت قبل كدا الحب الغريب ؟
عارف لما تبقى بتحب حد اوووى وتبقى بتتمنى انك ترضيه بكل الطرق وتبقى كل اللى محتاجه فى الوقت ده انك بس تشوفو قدامك ...
لما قلبك يفضل يدق بسرعة اول ما تلمحه !! وتحس انك بتطير من الفرحة لمجرد انك شفت اسمه ظاهر على الموبايل بيرن عليك !!
لما تحس انك عايز تجرى عليه وتاخده فى حضنك اول ما تشوفو جاى من بعيد !! لما تحب كل حاجة هو بيحبها حتى لو كنت مش بتحبها قبل كدا !! ولما تعمل اى حاجة لمجرد انه طلبها منك !! لما تحب اكله هو بيحبها واغنية هو بيحب يسمعها وتقلده فى طريقة كلامه كل الحاجات دى بتعملها لمجرد انه بيحبها !!!
عمرك جربت تقول اسف وانت مش غلطان وانت المجروح لمجرد انك مش عايز تخسر الانسان ده؟؟؟ قعدت تفكر مرة ازاى تسعد الانسان ده ومتخسرووش ؟؟؟ سامحت قبل كدا انسان كتير اوووى لدرجة انك غفرتله غلطات كان من المستحيل انك تغفرها لحد حتى لنفسك ؟؟؟ اشتاقت لحد قبل كدا لدرجة انك فضلت سهران الليل كله بتفكر بس فيه وتغمض عينيك وتتخيل كل لحظة معاه وتلقى نفسك بتبتسم ومبسوط ومشتاق للحظة اللى هتشوفو فيها تانى عشان تقوله بحبك ؟؟؟ لما تعمل حاجات كان من المستحيل انك تعملها عشان بس ترضيه ؟؟؟
عارف بقى لما تعمل كل ده وتسامح وتغفر وتعدى وتفضل تطلع مبررات واعذار عشان بس متبعدش عن الانسان ده ؟؟؟ وتكتشف بعد كدا انك ولا فارق معاه ووجودك زى عدمه فى حياته مجرد حاجة اتعود عليها فى حياته ويستنى ليك اول غلطة عشان يبعد بيها عنك ؟؟ لما ميقدرش يغفرلك غلطة انت مكنتش تقصدها ؟؟ لما تعمل كل حاجة عشان تصالحه ويسامحك وهو يرفض ويعاملك بكل احتقار ؟؟ لما تحس انك بتنزل من كرامتك عشانه وهو ميقدرش ده ؟؟ لما يسيئلك فى كل كلمة يقولها ؟؟
وقتها بتفتكر كل حاجة حصلت بينكم وكل حاجة انت عملتها عشانه ومعاه وقتها بتسال نفسك مش قادر يفتكر حاجة من دى ؟؟ نسى كل كلمة كل وعد وعدك بيه ؟؟ بتسال فين كل لحظة حلوة قضيتها معاه ؟؟ فين كل مرة شفته فيها وحسيت بحبه ؟؟ فين اللى كان بيقولك بحبك وانت حياتى ؟؟ وقتها بتحس احساس غريب بتبقى نفسك تكدب كل اللى بيحصل وبتحاول تطلع اى مبررات للى بيحصل مع انك عارف ان مفيش اى مبرر!! بس مش قادر تصدق اى حاجة من اللى بتحصل وقتها بتصعب عليك نفسك وفى نفس الوقت مش قادر تبعد وتفضل تحاول تطلع مبررات وتعتذر وتحاول ترجعه باى طريقة ومتلاقيش غير الجفا والقسوة !!!! ومتحسش غير ودموعك بتنزل منك وتبقى مش عارف بتبكى عليه وعلى نفسك ولا على الحب اللى ضاع منك ؟؟؟
ولما تيجى تكلمه وتعتذرله يرد عليك بكلمة يقولك ( مبقتش تلزمنى ) او يقولك (مبقتش طلباك) عارف وقتها ممكن تحس بايه ؟؟ بتحس انك مش قادر تاخد نفسك وان روحك بتتسحب منك ومش قادر تصرخ ولا تتكلم !! بتحس بالاهانة والالم وكأن حد بيغرس سكينة فى قلبك ومش قادر تمنعه ولا تقوله حاجة !! وبتسال نفسك وقتها هو ده اللى انت بتحبه هو ده اللى كان معاك قبلها بساعات وبيقولك بحبك ؟؟ ومتلاقيش رد وتفضل تكدب فى نفسك بس فى النهاية بتستسلم وترضى بالامر الواقع انه خلاص خرجت من حياته ومبقاش فى عندك حبيب ....... وتحس انك انتهيت !!
بس بتسأل نفسك بعد كدا هو فعلا كان بيحبك ؟ طيب مكنش قادر يغفرلك الغلطة دى ؟ طيب فين الحب اللى كان بيننا ؟ ؟؟؟
وتبقى فى النهاية انت وحدك اللى بتتالم وتتعذب ولاحد يحس بيك ولانت قادر حتى انك تكرهه ولا قادر تحبه وتلاقى نفسك فى متاهة مش عارف هتخرج منها ازاى ولا امتى ؟؟؟؟
وتلاقى نفسك فى حب غريب لا انت قادر تكره ولا قادر تحب !!!!
